Ka edhe nga këto ngjarje, që për fatin e mirë ka përfunduar pa viktima, por që mund të ishte mbyllur me një tragjedi.
Një 32- vjeçar në fshatin Barbullush të Shkodrës, Shpëtim Gërmaj, u hakmor ndaj faktit se e nxorën nga lokali ku po pinte, duke qëlluar me kallashnikov mbi lokal, por për fat pa shkaktuar viktima.
Gërmaj ishte konfliktuar me disa persona në një tavolinë tjetër të lokalit dhe kishte nxjerrë një thikë për t’i kërcënuar.
Por pronari i lokalit e ka nxjerrë jashtë atë.
Një gjë të tillë nuk e ka duruar dhe ka shkuar në shtëpi dhe është kthyer me një kallashnikov në krah. Pasi ka shkrehur një breshëri automatiku mbi lokal, ai është arratisur.
Policia e ka shpallur në kërkim për veprën penale të vrasjes të mbetur në tentativë ndaj dy ose më shumë personave si dhe për armëmbajtje pa leje.
